Isa 7 | NdeIBE | STEP | Kwathi u-Ahazi indodana kaJothamu, indodana ka-Uziya, eyinkosi yakoJuda, uRezini inkosi yase-Aramu loPhekha indodana kaRemaliya inkosi yako-Israyeli basuka bayahlasela iJerusalema, kodwa kabalinqobanga.

Isaiah 7

Isibonakaliso sika-Imanuweli

1 Kwathi u-Ahazi indodana kaJothamu, indodana ka-Uziya, eyinkosi yakoJuda, uRezini inkosi yase-Aramu loPhekha indodana kaRemaliya inkosi yako-Israyeli basuka bayahlasela iJerusalema, kodwa kabalinqobanga.

2 Indlu kaDavida yatshelwa kwathiwa, “IAramu isimanyene lo-Efrayimi,” inhliziyo ka-Ahazi lezabantu bakhe zanyikinyeka njengezihlahla zegusu zinyikinywa ngumoya.

3 UJehova wasesithi ku-Isaya, “Hamba wena lendodana yakho uSheyari-Jashubi ukuba lihlangabeze u-Ahazi ekucineni komgelo wamanzi oweChibi Elingaphezulu, emgwaqweni oya Ensimini Yomgezisi. 4 Lithi kuye, ‘Nanzelela, hlala ngokuthula, njalo ungesabi. Inhliziyo yakho kayingadeli ngenxa yolaka olwesabekayo lukaRezini lo-Aramu lolwendodana kaRemaliya.

5 U-Aramu lo-Efrayimi lendodana kaRemaliya sebecebe ukukutshabalalisa besithi, 6 “Kasihlaseleni ilizwe lakoJuda; kasilidabuleni phakathi silabelane senze indodana kaThabeyeli ibe yinkosi yalo.” 7 Kodwa-ke lokhu yikho okutshiwo nguJehova Wobukhosi ukuthi: “ ‘Akuyikuphumelela, akuyikwenzakala,

8 ngoba inhloko ye-Aramu yiDamaseko, inhloko yeDamaseko nguRezini kuphela. Phakathi kweminyaka engamatshumi ayisithupha lanhlanu u-Efrayimi uzakuba esetshabalele engaseyiso sizwe.

9 Inhloko ka-Efrayimi yiSamariya, inhloko yeSamariya yindodana kaRemaliya kuphela. Uma lingami liqine okholweni lwenu alisoze livele lime.’ ”

10 UJehova wakhuluma njalo ku-Ahazi wathi,

11 “Cela isibonakaliso kuJehova uNkulunkulu wakho, ingabe ekujuleni kwezulu loba phezulu engqongweni.”

12 Kodwa u-Ahazi wathi, “Angiyikucela. Angiyikulinga uJehova.”

13 U-Isaya wasesithi, “Khathesi-ke zwana wena lendlu kaDavida. Akwenelanga na ukulinga ukubekezela kwabantu? Uzalinga lokubekezela kukaNkulunkulu wami njalo na?

14 Ngakho-ke uJehova yena ngokwakhe uzanika isibonakaliso: Intombi emsulwa izathatha isisu izale indodana ezayetha ibizo ithi ngu-Imanuweli. 15 Uzakudla amasi loluju lapho eselolwazi olwaneleyo ukuba ale okubi akhethe okulungileyo. 16 Kodwa-ke umfana engakazi okwaneleyo ukuba ale okubi akhethe okulungileyo, ilizwe lamakhosi amabili owesabayo lizachithwa.

17 UJehova uzakwehlisela phezu kwakho laphezu kwabantu bakho, laphezu kwendlu kayihlo, isikhathi esingafani lesinye kusukela u-Efrayimi ebhazuka kuJuda – uzaletha inkosi yase-Asiriya.”

18 Ngalelolanga uJehova uzatshaya ikhwelo ebiza impukane ezisekudabukeni kwezifula zaseGibhithe lezinyosi eziselizweni lase-Asiriya.

19 Zizakuza zonke zihlale ezingoxweni ezingamawa, ezimbalwini zamadwala, ezihlahleni zonke zameva kuwo wonke amagodi amanzi. 20 Ngalolosuku uJehova uzasebenzisa impuco ebolekwe ngaphetsheya koMfula – inkosi yaseSiriya – ukuphuca ikhanda lakho loboya obusemibaleni yakho, lokugunda izindevu zakho lazo. 21 Ngalolosuku umuntu uzafuya ithokazi elilodwa lezimbuzi ezimbili.

22 Ngenxa yobunengi bochago oluzavela kuzo, uzakuba lamasi azawadla. Bonke abazasala elizweni bazakudla amasi loluju. 23 Ngalolosuku, ezindaweni zonke lapho okwakulamavini ayinkulungwane alingana amashekeli esiliva ayinkulungwane kuzakuba lokhula lameva kuphela. 24 Abantu bazakuya khona belamadandili lemitshoko ngoba ilizwe lizakuba seligcwele ukhula lameva. 25 Emaqaqeni wonke ake alinywa ngekhuba kawusayikuya khona ngenxa yokwesaba ukhula lameva, azakuba yindawo yokwelusela izinkomo lamadlelo ezimvu.